Photo - reuters
வெனிசுவேலா மீதான அமெரிக்காவின் பொருளாதாரத் தடைகளை மீறிச் செயல்பட்டதாகக் கூறி, ‘மரினேரா’ (Marinera) என்ற ரஷ்யக் கொடியுடன் பயணித்த கச்சா எண்ணெய் கப்பலை அமெரிக்க கடலோர காவல்படை வட அட்லாண்டிக் கடலில் வைத்து கைப்பற்றியது. இந்த நடவடிக்கைக்கு ரஷ்யா கடும் கண்டனம் தெரிவித்துள்ளதுடன், இது ஒரு “கடற்கொள்ளை” (Piracy) செயல் என சாடியுள்ளது.
வெனிசுவேலாவின் எண்ணெய் வர்த்தகத்திற்கு அமெரிக்கா விதித்துள்ள தடையை அமுல்படுத்தும் நோக்கில், கடந்த இரண்டு வாரங்களுக்கும் மேலாக அமெரிக்க கடலோர காவல்படை இக்கப்பலைப் பின்தொடர்ந்து வந்தது.
இந்தக் கண்காணிப்பில் இருந்து தப்பிக்க, இக்கப்பல் தனது பயணத்தின் போது பெயரையும், கொடியையும் பலமுறை மாற்றியது. கப்பல் தரவுத்தளங்களின்படி, கப்பலின் துருப்பிடித்த பகுதியில் அவசர அவசரமாக ரஷ்யக் கொடி வண்ணம் பூசப்பட்டதாகத் தெரிகிறது.
எவ்வாறாயினும், ஐஸ்லாந்தின் தெற்கு கடற்கரைக்கு அப்பால் சர்வதேச கடல் பகுதியில் வைத்து, பிரித்தானியாவின் ஒத்துழைப்புடன் நேற்று அமெரிக்க அதிகாரிகள் இக்கப்பலைத் தன்வசப்படுத்தினர்.
இரு நாடுகளின் நிலைப்பாடு
இந்த நடவடிக்கை குறித்து அமெரிக்க அதிகாரிகள் கூறுகையில், “மேற்கு அரைக்கோளத்தின் பாதுகாப்பு மற்றும் ஸ்திரத்தன்மைக்கு அச்சுறுத்தலாக விளங்கும் கப்பல்களை இலக்கு வைக்கும் திட்டத்தின் ஒரு பகுதியாகவே இது மேற்கொள்ளப்பட்டது” எனத் தெரிவித்தனர்.
மறுபுறம், ரஷ்யா தனது நீர்மூழ்கிக் கப்பல் மற்றும் பிற போர் கப்பல்களை அப்பகுதிக்கு அனுப்பியிருந்த நிலையிலும் அமெரிக்கா இக்கப்பலைச் சிறைபிடித்துள்ளது. இது ஒரு சட்டவிரோதச் செயல் என மொஸ்கோ கூறியுள்ளது.
நிபுணர்களின் கருத்து
கடல்சார் உளவுத்துறை நிறுவனமான ‘விண்ட்வார்ட்’ (Windward) அமைப்பைச் சேர்ந்த வல்லுநர்கள், ஒரு நேட்டோ நாடு சர்வதேச கடல் பகுதியில் ரஷ்ய கப்பலைக் கைப்பற்றியது இதுவே முதல்முறை எனக் குறிப்பிடுகின்றனர். அமெரிக்காவின் இந்த நடவடிக்கையின் விளைவு, வரும் காலங்களில் உலகளாவிய கப்பல் போக்குவரத்தில் பெரிய தாக்கத்தை ஏற்படுத்தும் என்றும், மேலும் பல கப்பல்கள் இவ்வாறு கைப்பற்றப்பட வாய்ப்புள்ளதாகவும் அவர்கள் எச்சரிக்கின்றனர்.
நிழல் கப்பல் படை (Shadow Fleet)
தடைகளைத் தவிர்க்க மறைமுகமான உரிமையாளர்களுடன் இயங்கும் ‘நிழல் கப்பல் படைகள்’ ஈரான் மற்றும் வடகொரியாவால் பல ஆண்டுகளாகப் பயன்படுத்தப்பட்டு வருகின்றன. தற்போது ரஷ்யா மீதான உக்ரைன் போர் தொடர்பான தடைகளால் இவற்றின் எண்ணிக்கை அதிகரித்துள்ள நிலையில், அமெரிக்காவின் இந்த அதிரடி நடவடிக்கை அத்தகைய மறைமுக வர்த்தகத்தைச் சிதைக்கக்கூடும் என எதிர்பார்க்கப்படுகிறது.