இலங்கையில் தற்போது நடைமுறையிலுள்ள பயங்கரவாதத் தடுப்புச் சட்டத்திற்கு (PTA) பதிலாக முன்மொழியப்பட்டுள்ள புதிய அரசினைப் பயங்கரவாதத்திலிருந்து பாதுகாக்கும் சட்டமூலமானது (PSTA), பழைய சட்டத்தைப் போலவே அடக்குமுறைகளுக்கும் மனித உரிமை மீறல்களுக்கும் வழிவகுக்கும் என மனித உரிமைகள் கண்காணிப்பகம் எச்சரித்துள்ளது. 2024 ஜனாதிபதித் தேர்தலின் போது வழங்கப்பட்ட வாக்குறுதிகளுக்கு மாறாக, டிசம்பர் 2025 இல் வெளியிடப்பட்ட இந்தப் புதிய சட்டமூலம் அமையும் சூழலில், இது சர்வதேச மனித உரிமைத் தரங்களையோ அல்லது ஐரோப்பிய ஒன்றியத்தின் GSP+ வரிச் சலுகைக்கான நிபந்தனைகளையோ பூர்த்தி செய்யவில்லை எனச் சுட்டிக்காட்டப்பட்டுள்ளது.
பயங்கரவாதம் என்பதற்கான வரைவிலக்கணம் இந்தப் புதிய சட்டத்தில் மிகவும் பரந்ததாகவும் தெளிவற்றதாகவும் இருப்பதால், சாதாரண அரசியல் செயல்பாடுகள், போராட்டங்கள் மற்றும் கருத்துச் சுதந்திரம் போன்றவை கூட பயங்கரவாதமாகச் சித்திரிக்கப்பட வாய்ப்புள்ளது. குறிப்பாக, பாதுகாப்புச் செயலாளரின் உத்தரவின் பேரில் ஓராண்டு வரை எவ்வித நீதித்துறை மேற்பார்வையுமின்றி ஒருவரைத் தடுத்து வைக்கவும், ஒட்டுமொத்தமாக இரண்டு ஆண்டுகள் வரை குற்றச்சாட்டின்றிக் காவலில் வைத்திருக்கவும் இச்சட்டம் வழிவகை செய்கிறது. பிடியாணை இன்றி சோதனை செய்யவும் கைது செய்யவும் இராணுவத்திற்கு வழங்கப்பட்டுள்ள அதிகாரம், கடந்த காலங்களில் இடம்பெற்ற சித்திரவதைகள் மீண்டும் நிகழும் என்ற அச்சத்தை ஏற்படுத்தியுள்ளது.
தமிழ் மற்றும் முஸ்லிம் சமூகங்கள் மற்றும் அரசாங்கத்தை விமர்சிப்பவர்களுக்கு எதிராக இத்தகைய சட்டங்கள் நீண்டகாலமாகப் பயன்படுத்தப்பட்டு வரும் நிலையில், புதிய அரசாங்கத்தின் கீழும் இத்தகைய கைதுகள் தொடர்வதை மனித உரிமைகள் கண்காணிப்பகம் சுட்டிக்காட்டியுள்ளது. 2025 ஆம் ஆண்டின் முதல் ஐந்து மாதங்களில் மட்டும் 49 பேர் கைது செய்யப்பட்டுள்ளனர், இது கடந்த ஆண்டை விட அதிகமாகும். இந்தச் சட்டமூலத்தின் இறுதி பெறுபேறு மீண்டும் ஒரு அடக்குமுறைச் சூழலை உருவாக்குவதாகவே அமையும் என்பதால், தற்போதைய சட்டத்திற்கு உடனடியாகத் தடை விதிக்க வேண்டும் என்றும், சிவில் சமூகத்துடன் இணைந்து மனித உரிமைகளை மதிக்கும் புதிய சட்டத்தை உருவாக்க வேண்டும் என்றும் அந்த அமைப்பு வலியுறுத்தியுள்ளது.
இந்த சட்டமூலம் தொடர்பாக ஜனாதிபதிக்கு சர்வதேச நாடுகள் அழுத்தம் கொடுக்க வேண்டும் என கேட்டுக்கொள்ளப்பட்டுள்ளது.