ஐக்கிய நாடுகள் மனித உரிமைகள் பேரவை (UNHRC) கூட்டத்தொடருக்கு முன்னதாக, பொறுப்புக்கூறலுக்கான சர்வதேச அழுத்தத்தை அதிகரிக்க அவசர மற்றும் ஒருங்கிணைந்த தமிழர் நடவடிக்கைக்கு தமிழ் தேசிய மக்கள் முன்னணியின் (TNPF) தலைவரும் யாழ்ப்பாண மாவட்ட பாராளுமன்ற உறுப்பினருமான கஜேந்திரகுமார் பொன்னம்பலம் அழைப்பு விடுத்துள்ளார்.
ஜெனீவா அமர்வுகளுக்கு முன்னதாக பாதிக்கப்பட்ட தமிழ் மக்களின் கோரிக்கைகளை முன்வைப்பதன் மூலம் வலுவான சர்வதேச அழுத்தத்தை உருவாக்குவதே TNPF-இன் நோக்கம் என அவர் மேலும் தெரிவித்துள்ளார்.
யாழ்ப்பாணத்தில் அண்மையில் நடைபெற்ற கூட்டமொன்றின் பின்னர் செய்தியாளர்களுக்கு கருத்துத் தெரிவித்த அவர், தமிழ் அரசியல் கட்சிகள், பொது அமைப்புகள், மனித உரிமை பாதுகாவலர்கள் மற்றும் சிவில் சமூக ஆர்வலர்கள் மத்தியில் ஒருமித்த கருத்தை உருவாக்கும் முகமாக இந்த கூட்டம் கூட்டப்பட்டதாகவும், இனப்படுகொலைக்கான பொறுப்புக்கூறலைப் பின்தொடர்வதில் ஒருங்கிணைந்த நிலைப்பாட்டை நிறுவுவதே இதன் முக்கிய நோக்கம் என்றும் அவர் கூறினார்.
இலங்கை தமிழரசுக் கட்சி இந்த செயற்பாட்டில் பங்கேற்காமை கவலையளிக்கிறது என்றும் கஜேந்திரகுமார் குறிப்பிட்டார். UNHRC-யில் மட்டுமல்லாமல், நீதி தேடுவதில் தொடர்ச்சியான நடவடிக்கைகள் தேவைப்படுகின்றன என்றும் அவர் வலியுறுத்தினார்.