கனடாவுக்காக ஒலிம்பிக் போட்டிகளில் பங்கேற்ற முன்னாள் பனிச்சறுக்கு வீரர் ரையன் ஜேம்ஸ் வெட்டிங்கிற்கு எதிராக மேலும் பல தீவிர குற்றச்சாட்டுகள் பதிவு செய்யப்பட்டுள்ளதாக அமெரிக்க அரச அதிகாரிகள் அறிவித்துள்ளனர்.
அமெரிக்க சட்டத்துறை அதிகாரி பாம் பாண்டி செய்தியாளர் சந்திப்பில் தெரிவித்ததன்படி, வெட்டிங்கிற்கு எதிராக கொலை, சாட்சியை மிரட்டியமை, பணமோசடி மற்றும் போதைப்பொருள் கடத்தல் உள்ளிட்ட புதிய குற்றச்சாட்டுகள் முன்வைக்கப்பட்டுள்ளன.
கொலம்பியாவில் அரசின் வழக்கிற்கு முக்கியமான சாட்சியாளராக இருந்த ஒருவரை கொன்ற சம்பவத்தில் வெட்டிங் தொடர்புடையதாக சந்தேகிக்கப்படுவதால் கொலை குற்றச்சாட்டு சேர்க்கப்பட்டதாக அவர் குறிப்பிட்டார்.
“அரசின் சாட்சியாளர்கள் பழிவாங்குதலிலிருந்து பாதுகாப்பது எங்கள் துறையின் முக்கிய பணி. இது தனிப்பட்ட பாதுகாப்பைப் பற்றியது மட்டுமல்ல; சட்டத்தின் ஆட்சியைப் பாதுகாப்பது குறித்தும் ஆகும்,” என்று பாண்டி கூறினார்.
வெட்டிங்கை கண்டுபிடிக்க அதிகாரிகள் கடந்த ஒரு வருடத்திற்கும் மேலாக தேடிவருகின்றனர். போதைப்பொருள் கடத்தல் கும்பலை இயக்கியதாக குற்றம் சாட்டப்பட்ட அவர் தற்போது FBIயின் மிகவும் தேடப்படும் 10 பேர் பட்டியலில் இடம்பெற்றுள்ளார். மேலும், அவரை கைது செய்ய வழிவகுக்கும் தகவலுக்கான பரிசுத்தொகை 10 மில்லியன் டொலரிலிருந்து 15 மில்லியன் டொலராக உயர்த்தப்பட்டுள்ளதாக பாண்டி தெரிவித்தார்.
வெட்டிங் ஆரம்பத்தில் 2024 ஆம் ஆண்டிலேயே கோகைன் கடத்தல் சதி மற்றும் கொலை உள்ளிட்ட பல குற்றச்சாட்டுகள் தொடர்பாக குற்றம் சாட்டப்பட்டிருந்தார்.
வெட்டிங்கின் கும்பல் கொலம்பியாவிலிருந்து மெக்சிக்கோ வழியாக அமெரிக்கா மற்றும் கனடாவுக்கு மிகப்பெரிய அளவில் கோகைன் கடத்தியுள்ளதாக அமெரிக்க அதிகாரிகள் கூறியுள்ளனர். மேலும், இந்தக் கும்பல் இதுவரை நான்கு பேரைக் கொன்றுள்ளது என்றும், அதில் கனடாவில் இருந்த ஒரு குடும்பத்தின் இரு உறுப்பினர்கள் தவறாக அடையாளம் காணப்பட்டு பழிவாங்கும் நோக்கில் கொல்லப்பட்டதாகவும் தெரிவிக்கப்பட்டுள்ளது.
வெட்டிங் மீது கனடாவிலும் போதைப்பொருள் கடத்தல் தொடர்பான வழக்குகள் நிலுவையில் உள்ளன. அவர் தற்போது மெக்சிக்கோவில் உள்ளார் என்று அதிகாரிகள் நம்புகின்றனர்.
இந்த வழக்குடன் தொடர்புடையதாக குறைந்தது 12 பேர் அமெரிக்கா, மெக்சிக்கோ, கொலம்பியா மற்றும் கனடாவில் கைது செய்யப்பட்டுள்ளனர்.