இலங்கையின் மத்திய மாகாணத்தில் ‘டிட்வா’ புயலால் துண்டிக்கப்பட்டிருந்த கண்டி மற்றும் நுவரெலியா மாவட்டங்களை இணைக்கும் பி-492 (B-492) நெடுஞ்சாலையில், இந்திய இராணுவம் மூன்றாவது பெய்லி பாலத்தை வெற்றிகரமாக அமைத்துள்ளது.
கடந்த ஆண்டு இறுதியில் இலங்கையைத் தாக்கிய டிட்வா புயல், நாட்டின் பல்வேறு பகுதிகளில் பாரிய வெள்ளப்பெருக்கு மற்றும் மண்சரிவுகளை ஏற்படுத்தியது. இதனால் உள்கட்டமைப்புகள் கடுமையாகப் பாதிக்கப்பட்டு, பல பிரதான வீதிகள் துண்டிக்கப்பட்டன. குறிப்பாக, கண்டி மற்றும் நுவரெலியா இடையிலான போக்குவரத்து ஒரு மாதத்திற்கும் மேலாக முடங்கியிருந்தது.
இந்நிலையில், இந்தியாவின் ‘அயலகத்திற்கே முன்னுரிமை’ கொள்கையின் கீழ், பாதிக்கப்பட்ட பகுதிகளில் மனிதாபிமான உதவிகளை வழங்க ‘சாகர் பந்து’ நடவடிக்கை 2025 நவம்பரில் தொடங்கப்பட்டது. இதன் ஒரு பகுதியாக, இந்திய இராணுவத்தின் பொறியியல் அதிரடிப்படையினர் (Engineer Task Force) பாலங்களை அமைக்கும் பணியில் ஈடுபட்டு வருகின்றனர்.
ஏற்கனவே யாழ்ப்பாணம் மற்றும் கண்டி பிராந்தியங்களில் இரண்டு பாலங்களை அமைத்திருந்த நிலையில், தற்போது பி-492 நெடுஞ்சாலையின் 15-வது கிலோமீட்டர் (KM 15) பகுதியில் 120 அடி நீளமான இந்தப் புதிய பாலம் அமைக்கப்பட்டுள்ளது. முன்னதாக, ஜனவரி மாதத் தொடக்கத்தில் இதே வீதியின் 21-வது கிலோமீட்டர் பகுதியில் போக்குவரத்து சீர்செய்யப்பட்டது.
இந்த விரைவான நடவடிக்கையின் காரணமாக,போக்குவரத்து நேரம் கணிசமாகக் குறைந்துள்ளது, அத்தியாவசியப் பொருட்களின் விநியோகம் சீராகியுள்ளது மற்றும் தனிமைப்படுத்தப்பட்டிருந்த கிராமப்புற சமூகங்கள் மீண்டும் பிரதான நகரங்களுடன் இணைக்கப்பட்டுள்ளன.
பிராந்திய நெருக்கடிகளின் போது முதன்மையான உதவியாளராக இந்தியா செயல்படுவதையும், இரு நாடுகளுக்கும் இடையிலான வலுவான நட்புறவையும் இந்தத் திட்டம் மீண்டும் உறுதிப்படுத்தியுள்ளதாக இந்திய இராணுவம் தனது ‘X’ சமூக வலைத்தளப் பக்கத்தில் பதிவிட்டுள்ளது.