இலங்கையில் சொந்த வீடு வாங்கும் கனவு நனவாவது மேலும் கடினமாகிறது

இலங்கையின் சொகுசு சொத்து சந்தையில் வெளிநாட்டு முதலீடுகள் பெருமளவில் குவிந்தாலும், சாதாரண குடிமக்களுக்குச் சொந்த வீடு என்பது அவர்களின் எட்டாக்கனியாகி வருகிறது.

நாட்டின் பொருளாதாரம் மீட்சியடைவதற்கான அறிகுறிகளைக் காட்டினாலும், சர்வதேச முதலீட்டாளர்கள் உயர்தர அடுக்குமாடி குடியிருப்புகள் மற்றும் ஹோட்டல்களில் ஆர்வத்துடன் முதலீடு செய்தாலும், உள்ளூர் குடும்பங்கள் மலிவு விலையிலான வீட்டுப் பற்றாக்குறையை எதிர்கொள்கின்றன.

அதிகரித்து வரும் வெளிநாட்டு முதலீடுகளுக்கும், உள்ளூர் வீடு வாங்குபவர்களின் அன்றாடப் போராட்டங்களுக்கும் இடையிலான இந்த இடைவெளி ஒரு அவசர நெருக்கடியை உருவாக்கியுள்ளது.

நாடு உண்மையாக முன்னேற வேண்டுமானால், வீட்டு உரிமையானது செல்வந்தர்களுக்கு மட்டுமே உரித்தான ஒரு சலுகையாக மாறாமல் இருப்பதை உறுதி செய்ய வேண்டிய அவசரத் தேவை உள்ளது.

பற்றாக்குறை மற்றும் கட்டுப்படியாகாத விலை:

லங்கா ப்ராபர்ட்டி வெப் (LankaPropertyWeb) வெளியிட்டுள்ள ‘இலங்கை ரியல் எஸ்டேட் சந்தை நோக்கு 2026’ அறிக்கையின்படி, நாட்டில் சுமார் 187,508 வீடுகளுக்கான தட்டுப்பாடு நிலவுகிறது.

இது 2012 ஆம் ஆண்டிலிருந்து 13 சதவீத அதிகரிப்பாகும்.

சர்வதேச அளவில் கவனம் ஈர்த்துள்ள விலை உயர்வு நெருக்கடியால் இந்தப் பற்றாக்குறை மேலும் சிக்கலாகியுள்ளது.

நும்பியோவின் (Numbeo) சமீபத்திய சொத்து விலைக் குறியீட்டின்படி, வீடு வாங்குவதற்கு உலகின் மிகவும் மலிவற்ற (unaffordable) நகரமாக கொழும்பு தரப்படுத்தப்பட்டுள்ளது.

கொழும்பின் விலை-வருமான விகிதமானது முன்னெப்போதும் இல்லாத வகையில் 55.1 ஆகப் பதிவாகியுள்ளது.

இதேபோல், ‘தி எகனாமிஸ்ட்’ (The Economist) இதழின் அறிக்கையும் ஆசியாவிலேயே இரண்டாவது மிகவும் மலிவற்ற வீட்டுச் சந்தையாக இலங்கையைக் குறிப்பிட்டுள்ளது.

வருமானத்திற்கும் செலவிற்குமான இடைவெளி:

சராசரி மாதாந்திர குடும்ப வருமானம் சுமார் 76,414 ரூபாவாகவே உள்ளது.

ஆனால், நகர்ப்புற இலங்கையில் அடிப்படை வாழ்க்கைத் தரத்திற்குத் தேவையான ‘அங்கர் வாழ்க்கை ஊதியக் குறிப்பு மதிப்பு’ (Anker Living Wage Reference Value) 84,231 ரூபாவாகும்.

வருமானத்தின் பெரும் பகுதி அத்தியாவசியச் செலவுகளுக்கே போதாத நிலையில், சாதாரண மக்களுக்கு ஆரம்ப நிலை வீடுகள் கூட வாங்க முடியாத ஒன்றாகவே உள்ளன.

இதனால், மக்கள் இந்தக் குறையை நிவர்த்தி செய்யக் கடன்களை நாட வேண்டிய கட்டாயத்திற்குத் தள்ளப்பட்டுள்ளனர்.

முதலீடுகளும் கட்டுமானச் செலவுகளும்:

2025ஆம் ஆண்டில் வெளிநாட்டு நேரடி முதலீடு 74 சதவீதத்தால் அதிகரித்து 1.06 பில்லியன் அமெரிக்க டொலர்களை எட்டியுள்ளது.

குறிப்பாக வீடு மற்றும் சொத்து மேம்பாட்டுத் துறைக்கான முதலீடுகள் 20.5 மில்லியன் டொலரிலிருந்து 56.2 மில்லியன் டொலர்களாக கிட்டத்தட்ட மூன்று மடங்காக அதிகரித்துள்ளன.

இருப்பினும், அதிகரித்து வரும் கட்டுமானச் செலவுகள் காரணமாக இந்த முதலீடுகளை மலிவு விலையிலான வீடுகளாக மாற்றுவதில் சிக்கல் உள்ளது.

பொருட்களின் விலை உயர்வு, போக்குவரத்துச் செலவு மற்றும் திறமையான தொழிலாளர் பற்றாக்குறை காரணமாக 2025 இன் மூன்றாம் காலாண்டில் கட்டுமானச் செலவுக் குறியீடு 77.20 புள்ளிகளாக உயர்ந்துள்ளது.

எதிர்காலத் தேவை:

இலங்கை மத்திய வங்கி வீட்டுக்கடன் வட்டி விகிதங்களை 7% முதல் 15% வரை குறைத்துள்ளது ஒரு சாதகமான விடயமாகும். இருப்பினும், நாட்டில் நிலவும் பாரிய வீட்டுத் தட்டுப்பாட்டை நிவர்த்தி செய்ய, குறைந்த செலவிலான கட்டுமான முறைகள் மற்றும் இலக்கு வைக்கப்பட்ட கொள்கைகள் அவசியமாகும்.

அப்போதுதான் வீட்டுரிமை என்பது இலங்கையில் ஒரு ஆடம்பரப் பொருளாக மாறாமல் இருப்பதை உறுதி செய்ய முடியும்.