முன்னாள் சுகாதார அமைச்சர் கெஹெலிய ரம்புக்வெல்லவின் மகன் ரமித் ரம்புக்வெல்லவுக்கு எதிராக இலஞ்ச மற்றும் ஊழல் ஒழிப்பு ஆணைக்குழு, கொழும்பு மேல் நீதிமன்றில் குற்றப்பத்திரிகை தாக்கல் செய்துள்ளது.
கெஹெலிய ரம்புக்வெல்ல சுகாதார அமைச்சராக பதவி வகித்த 2022 ஜனவரி 1 முதல் 2023 நவம்பர் 14 வரை (21 மாதங்கள்), அவரது தனிப்பட்ட செயலாளராக பணியாற்றிய ரமித், ரூ. 296,566,444.76 மதிப்புள்ள சொத்துக்களை கையகப்படுத்தியுள்ளதாக விசாரணைகளில் கண்டறியப்பட்டுள்ளது.
இதில், ரூ. 275,302,616.06 மதிப்புள்ள சொத்துக்கள் எவ்வாறு கையகப்படுத்தப்பட்டன என்பது குறித்த தெளிவான விளக்கத்தை அவர் வழங்கத் தவறியதாக குற்றம் சாட்டப்பட்டுள்ளது.
வெளிப்படுத்தப்படாத சொத்துகளில், கொழும்பு 07 தர்மபால மாவத்தையில் அமைந்துள்ள ஒரு சொகுசு வீட்டு வளாகத்தில் ரூ. 80 மில்லியன் மற்றும் ரூ. 65 மில்லியன் மதிப்புள்ள இரண்டு வீடுகள் அடங்குகின்றன. அதேபோல், அவரது பெயரில் நான்கு வங்கிக் கணக்குகள், மனைவியின் பெயரில் நான்கு வங்கிக் கணக்குகள், ரூ. 18 மில்லியன் மதிப்புள்ள டிஸ்கவரி ஜீப் மற்றும் பிற சொத்துக்களும் உள்ளதாக லஞ்ச ஒழிப்பு ஆணையம் நீதிமன்றத்தில் தெரிவித்துள்ளது.
மேலும், குற்றம் சாட்டப்பட்டவர் மற்றும் அவரது மனைவியின் பெயரில் வங்கிகளில் நிலையான வைப்புகளும் இருப்பதாக ஆணையம் சுட்டிக்காட்டியுள்ளது.
இதனையடுத்து, ஊழல் தடுப்புச் சட்டத்தின் கீழ் ரமித் ரம்புக்வெல்லவுக்கு எதிராக நேற்று (12) குற்றப்பத்திரிகை தாக்கல் செய்யப்பட்டுள்ளது.