மூன்று குழந்தைகளின் தந்தையான 44 வயது பிரசாந்த் ஸ்ரீகுமாரின் மரணம், கனடா முழுவதையும் உலுக்கியுள்ளது. அவசர சிகிச்சைப் பிரிவில் பல மணிநேரம் காத்திருந்த பின் அவர் உயிரிழந்தார். அந்தக் காத்திருப்பு நேரமே அவரது உயிரைப் பறிக்கும் காரணியாக மாறியது. அபிவிருத்தி அடைந்த ஒரு நாடு எதிர்கொள்ளக் கூடாத ஒரு கேள்வியை அவரது கதை எழுப்புகிறது. கனடாவைப் போன்ற ஒரு நாட்டில், ‘காத்திருப்பதே’ மரணத்திற்கு எப்படி காரணமாக அமைய முடியும்?
எட்மண்டனில் உள்ள கிரே நன்ஸ் (Grey Nuns) மருத்துவமனையின் அவசர சிகிச்சைப் பிரிவில் பிரசாந்த் உயிரிழந்தார். “எனக்கு நீதி வேண்டும்” என்ற அவரது மனைவியின் வார்த்தைகள் வெறும் அரசியல் முழக்கமல்ல, அது ஒரு குடும்பத்தின் ஆழமான துயரம். அவசர சிகிச்சைப் பிரிவிற்குச் சென்ற தனது கணவர் எப்படி சடலமாகத் திரும்பினார் என்பதை புரிந்து கொள்ளத் துடிக்கும் ஒரு மனைவியின் அழுகுரல் அது.
இந்தச் சம்பவம் குறித்து ‘கவனன்ட் ஹெல்த்’ (Covenant Health) நிறுவனம் உள்வாரியான விசாரணையைத் தொடங்கியுள்ளது. ஆல்பர்ட்டா அரசாங்கமும் இது குறித்த தீவிரமான விசாரணையை உறுதிப்படுத்தியுள்ளது.
ஒரு தேசிய அளவிலான நெருக்கடி
இந்தத் துயரம் தனிப்பட்ட ஒரு நிகழ்வு அல்ல. 2024-2025 ஆம் ஆண்டில் மட்டும், அறுவை சிகிச்சைகள் மற்றும் நோயறிதல் பரிசோதனைகளுக்காகக் காத்திருந்தபோது 23,000-க்கும் அதிகமான கனடியர்கள் உயிரிழந்துள்ளதாக CTV நியூஸ் ஆய்வில் தெரிவிக்கப்பட்டுள்ளது. இது ஒரு தனிப்பட்ட மருத்துவமனையின் சிக்கலல்ல, மாறாக முழு சுகாதாரக் கட்டமைப்பிலும் உள்ள முறையான பிழை என்பதையே இந்தத் தரவுகள் காட்டுகின்றன.
கனடா ஒரு G7 நாடு. 2 டிரில்லியன் டொலருக்கும் அதிகமான மொத்த உள்நாட்டு உற்பத்தியையும், நவீன மருத்துவக் கல்வி நிறுவனங்களையும் கொண்ட ஒரு தேசம். இருந்தும், அவசர சிகிச்சைப் பிரிவுகள் ஏன் திணறுகின்றன? படுக்கை வசதி பற்றாக்குறை, ஊழியர் பற்றாக்குறை போன்ற காரணங்களால் மருத்துவர்கள் பெரும் அழுத்தத்திற்கு உள்ளாகிறார்கள். இத்தகைய சூழலில், நேரம் என்பது மிகவும் அரிதான மற்றும் ஆபத்தான ஒன்றாக மாறுகிறது.
செயற்கை நுண்ணறிவின் (AI) பங்கு
2025ல், கனடிய அரசாங்கம் செயற்கை நுண்ணறிவு மற்றும் டிஜிட்டல் கண்டுபிடிப்புகளுக்கான அமைச்சராக இவான் சொலமனை (Evan Solomon) நியமித்தது. சுகாதாரத் துறையில் இந்தப் தலைமைத்துவம் தற்போது மிக அவசரமாகத் தேவைப்படுகிறது.
செயற்கை நுண்ணறிவு என்பது மருத்துவர்களுக்கு மாற்றானது அல்ல; ஆனால் அது ஒரு உதவியாளராகச் செயல்பட முடியும். AI கருவிகள் மூலம் பின்வரும் மாற்றங்களைக் கொண்டுவர முடியும்:
-
திறமையான வகைப்படுத்துதல் (Triage): அதிக ஆபத்தில் உள்ள நோயாளிகளை விரைவாகக் கண்டறிய AI உதவும்.
-
முன்கணிப்பு அமைப்புகள்: மருத்துவமனைகளில் நோயாளிகளின் சேர்க்கையை முன்கூட்டியே கணித்து நெருக்கடியைத் தவிர்க்கலாம்.
-
நிர்வாகப் சுமை குறைப்பு: மருத்துவர்கள் காகிதப் பணிகளில் செலவிடும் நேரத்தைக் குறைத்து, நோயாளிகளைக் கவனிக்க அதிக நேரம் ஒதுக்க AI உதவும்.
ஒன்டாரியோவில் உள்ள மைக்கேல் கரோன் மருத்துவமனை போன்ற பல இடங்கள் ஏற்கனவே இத்தகைய தொழில்நுட்பங்களைப் பயன்படுத்தத் தொடங்கிவிட்டன.
பிரசாந்த் ஸ்ரீகுமாரின் மனைவிக்கு நீதி என்பது வெறும் பழிவாங்குதல் அல்ல. தனது கணவரின் மரணத்திற்கு முன்னால் இருந்த அந்தக் காத்திருப்பு தவிர்க்க முடியாததா அல்லது கட்டமைப்பின் குறைபாடா என்பதை அறிவதே நீதியாகும்.
கனடாவின் ‘அனைவருக்கும் சுகாதாரம்’ என்ற உறுதிமொழி என்பது வெறும் சிகிச்சைக்கான வாய்ப்பு மட்டுமல்ல, அது ‘சரியான நேரத்தில்’ கிடைக்கும் சிகிச்சையையும் உள்ளடக்கியது. காலம் கடந்து கிடைக்கும் சிகிச்சை ஒரு தோல்வியாகும்.
பிரசாந்த் ஸ்ரீகுமார் காத்திருந்தே உயிரிழந்தார். கனடா இன்னும் காத்திருக்கப் போகிறதா அல்லது பொறுப்பான தொழில்நுட்பங்களைப் பயன்படுத்தி இந்த உயிரிழப்புகளைத் தடுக்கப் போகிறதா என்பதே இன்றைய கேள்வி. இந்த மாற்றத்தின் பெறுபேறு (result) ஆயிரக்கணக்கான உயிர்களைக் காப்பதாக அமைய வேண்டும்.
அருண் ஆரோக்கியநாதன்