தென்னாபிரிக்காவின் உண்மை ஆணைக்குழுவின் பின்னால் ஒளிந்துகொண்டு அதன் உண்மை ஆணைக்குழுவை விற்க இலங்கை திட்டமிட்டுள்ளது. இலங்கை இதுவரை பத்து ஆணைக்குழுக்களை நிறுவியும் முடிவுகள் எடுக்கப்படவில்லை என நாடு கடந்த தமிழீழ அரசாங்கத்தின் (TGTE) பிரதமர் விசுவநாதன் ருத்ரகுமாரன் தெரிவித்தார்.
ஜனாதிபதி ரணில் விக்ரமசிங்கவின் ஐ.நா வருகை மற்றும் பொதுச் சபையில் உரையாற்றிமைக்கு எதிராக ஐ.நா.விற்கு வெளியே புலம்பெயர் தமிழர்கள் நேற்றுமுன்தினம் பேரணியொன்றை நடத்தினர்.
இந்தப் பேரணியில் பங்கேற்று உரையாற்றிய போதே விசுவநாதன் ருத்ரகுமாரன் மேற்கண்டவாறு கூறினார்.
அவர் மேலும் உரையாற்றுகையில்,
“பல ஆண்டுகளாக இலங்கை பத்துக்கும் மேற்பட்ட ஆணைக்குழுக்களை ஸ்தாபித்துள்ளது. ஆனால், எந்தப் பலனும் இல்லை.
ஆணைக்குழுக்களை நிறுவுவது சர்வதேச சமூகத்தை ஏமாற்றுவதும் தான் இலங்கையின் ஒரே செயல்பாடாகவுள்ளது.
இலங்கை தென்னாபிரிக்காவின் உண்மை ஆணைக்குழுவின் பின்னால் ஒளிந்துகொண்டு அதன் உண்மை ஆணைக்குழுவை விற்க திட்டமிட்டுள்ளது.
உண்மை ஆணைக்குழு என்ற பெயரைத் தவிர இரண்டுக்கும் பெரிய வேறுபாடுகள் உள்ளன.
தென்னாப்பிரிக்காவின் உண்மை ஆணையம் மோதல் முடிவுக்கு வந்த பின்னர் ஸ்தாபிக்கப்பட்டது. ஆனால், இலங்கையில் ஆயுத மோதல்கள் முடிந்துவிட்ட நிலையில், தமிழர்களுக்கும் அரசுக்கும் இடையிலான தேசிய முரண்பாடு இன்னும் தீர்க்கப்படவில்லை.
தென்னாப்பிரிக்காவில் உண்மை ஆணையம் பாதிக்கப்பட்டவர்களால் முன்மொழியப்பட்டு நிர்வகிக்கப்பட்டது. ஆனால், இலங்கையில், பாதிக்கப்பட்டவர்களுக்கு எதிராக பாரிய அட்டூழியங்களைச் செய்தவர்கள் இந்த ஆணைக்குழுவில் முன்னணியில் இருப்பவர்கள்.
இலங்கையால் முன்மொழியப்பட்ட “உண்மை ஆணைக்குழு” என்று அழைக்கப்படுவதைக் கருத்தில் கொள்வதற்கு முன்பு, அட்டூழியக் குற்றங்களில் பாதிக்கப்பட்டவர்களுக்கு முதலில் நீதியைப் பெற வலியுறுத்த வேண்டும் என நாங்கள் ஐ.நாவை வலியுறுத்துகிறோம்.
இலங்கையின் வலையில் விழ வேண்டாம். அதற்குப் பதிலாக ஐ.நா.வின் மூத்த அதிகாரிகள் மற்றும் ஐ.நா மனித உரிமைகளுக்கான முன்னாள் உயர்ஸ்தானிகர் இலங்கையை சர்வதேச குற்றவியல் நீதிமன்றத்தில் நிறுத்தும் முன்மொழிவை வழங்கியுள்ளனர். அதில் கரிசனை கொள்ள வேண்டும்” என்றும் அவர் வலியுறுத்தியுள்ளார்.