எதிர்வரும் ஜனாதிபதி தேர்தலில் தான் வெற்றிபெறும் நோக்கில் போட்டியிடவில்லை என சுயேட்சை ஜனாதிபதி வேட்பாளர் எம்.திலகராஜ் தெரிவித்துள்ளார்.
ஹட்டனில் உள்ள தனது அலுவலகத்தில் வைத்து பேசிய அவர் இதனை குறிப்பிட்டுள்ளார். தொடர்ந்தும் கருத்து வெளியிட்ட அவர்,
1948 ஆம் ஆண்டு சுதந்திரத்திற்குப் பிறகு, 1949 இல், இந்தத் பெருந்தோட்ட மக்களின் குடியுரிமை உரிமைகள் நாடாளுமன்ற சட்டத்தின் மூலம் அகற்றப்பட்டன.
பின்னர் 1977 ஆம் ஆண்டு பெருந்தோட்டத்தைச் சேர்ந்த ஒருவர் வாக்கெடுப்பு மூலம் நாடாளுமன்றம் சென்றார். அதன் பின்னர் இந்தத் பெருந்தோட்டப் பகுதிகளைச் சேர்ந்த பலர் நாடாளுமன்றம் சென்றுள்ளனர்.
இந்நிலையில், பெருந்தோட்டத்தைச் சேர்ந்த ஒருவரும் ஜனாதிபதித் தேர்தலில் போட்டியிட முடியும் என்பதை நான் நிரூபிக்க விரும்பினேன்.
இந்த ஆண்டு ஜனாதிபதி தேர்தலில் போட்டியிடும் ஒருவர் சுமார் 200 கோடி ரூபாவை செலவிடுவார்கள் என தெரிவிக்கப்படுகிறது.
இந்தப் பணத்தில் ஒரு கோடி ரூபாயை பெருந்தோட்டங்களுக்குச் செலவிட்டிருந்தால் அங்குள்ள மக்களுக்கு இவ்வளவு பிரச்சினைகள் இருந்திருக்காது.
இந்த நாட்டின் பொருளாதாரத்திற்கு அதிக பங்களிப்பை வழங்குவதற்கும், இந்த நாட்டின் பொருளாதாரத்தை வலுப்படுத்துவதற்கும் பெருந்தோட்ட மக்களே அதிகம் உதவுகின்றனர்.
தற்போது இந்த தோட்ட மக்கள் குழிக்குள் உள்ளனர். அந்த மக்களை அவர்கள் விழுந்த குழியிலிருந்து மீட்க வேண்டும். இங்குள்ள மக்கள் குறித்து நாட்டுக்கும் சர்வதேசத்துக்கும் கூறப்பட்டுள்ளது.
அதனால்தான் நான் இந்த ஜனாதிபதித் தேர்தலில் வெற்றி பெறுவதற்காக போட்டியிடவில்லை, அதைச் சொல்வதற்காகத்தான் என்று ஆரம்பத்தில் கூறினேன் என மேலும் தெரிவித்துள்ளார்.