கனடாவில் வேலையின்மை விகிதம் ஆறு மாதங்களில் இல்லாத அளவுக்கு உயர்வு – இளைஞர்கள் அதிகம் பாதிப்பு

கனடாவில் வேலைவாய்ப்புச் சந்தை தொடர்ந்து நெருக்கடியைச் சந்தித்து வரும் நிலையில், ஒக்டோபர் மாதத்தில் வேலையின்மை விகிதம் ஆறு மாதங்களில் இல்லாத அளவுக்கு உயர்ந்துள்ளது.

கனடாவின் புள்ளிவிபரத் திணைக்களம் நவம்பர் 6ஆம் திகதி வெளியிட்ட தொழிலாளர் சந்தை ஆய்வறிக்கையின்படி, ஒக்டோபர் மாதத்தில் நாட்டின் வேலையின்மை விகிதம் 6.7 சதவீதமாக உயர்ந்துள்ளது. கடந்த செப்டெம்பர் மாதத்தில் இந்த விகிதம் 6.5 சதவீதமாகப் பதிவாகியிருந்தது.

ஒக்டோபரில் கனடாவில் சுமார் 4,700 வேலைவாய்ப்புகள் குறைந்துள்ளன. இதன் மூலம் தொடர்ந்து மூன்றாவது மாதமாக வேலைவாய்ப்பு வளர்ச்சி பாதிக்கப்பட்டுள்ளது.

இதற்கு முன்னர் கடந்த ஓகஸ்ட் மாதத்தில் 42,000 வேலைவாய்ப்புகளும், செப்டெம்பர் மாதத்தில் 68,000 வேலைவாய்ப்புகளும் குறைந்திருந்தன. கடந்த மூன்று மாதங்களில் மொத்தமாக சுமார் 115,000 வேலைவாய்ப்புகள் இழக்கப்பட்டுள்ளன.

தனியார் துறையில் 53,000 வேலைவாய்ப்புகள் குறைவு

ஒக்டோபர் மாதத்தில் தனியார் துறையில் 53,000 வேலைவாய்ப்புகள் குறைந்துள்ளன. கடந்த பெப்ரவரி மாதத்திற்குப் பின்னர் தனியார் துறையில் பதிவான முதல் மாதாந்த வேலைவாய்ப்பு வீழ்ச்சி இதுவாகும்.

அதேவேளை, அரச துறையில் 50,000 புதிய வேலைவாய்ப்புகள் அதிகரித்துள்ளன. இதனால் தனியார் துறையில் ஏற்பட்ட வீழ்ச்சியின் தாக்கம் ஓரளவு ஈடுசெய்யப்பட்டுள்ளது.

குறிப்பாக, மொத்த மற்றும் சில்லறை விற்பனைத் துறையில் 29,000 வேலைவாய்ப்புகள் குறைந்துள்ளன. போக்குவரத்து மற்றும் களஞ்சியப்படுத்தல் துறையிலும் சுமார் 10,000 வேலைவாய்ப்புகள் இழக்கப்பட்டுள்ளன.

மறுபுறம், கட்டுமானத் துறையில் 16,000 வேலைவாய்ப்புகளும், கல்விச் சேவைகள் துறையில் 15,000 வேலைவாய்ப்புகளும் அதிகரித்துள்ளன.

👉இளைஞர்களிடையே வேலையின்மை அதிகரிப்பு

கனடாவில் இளைஞர்களிடையே வேலையின்மை விகிதமும் அதிகரித்துள்ளது. 15 முதல் 24 வயதுக்குட்பட்ட இளைஞர்களுக்கான வேலையின்மை விகிதம் செப்டெம்பர் மாதத்தில் 13 சதவீதமாக இருந்த நிலையில், ஒக்டோபரில் 13.7 சதவீதமாக உயர்ந்துள்ளது.

மேலும், 55 வயதுக்கு மேற்பட்டவர்களுக்கான வேலையின்மை விகிதம் 5.5 சதவீதமாக அதிகரித்துள்ளது.

ஒக்டோபர் மாதத்தில் வேலை தேடியவர்களின் எண்ணிக்கையும் சுமார் 33,000 பேரால் அதிகரித்துள்ளது. இதனால் வேலை தேடுபவர்களிடையே போட்டி அதிகரித்துள்ளதாகப் பொருளாதார ஆய்வாளர்கள் சுட்டிக்காட்டுகின்றனர்.

👉ஒன்ராறியோவில் வேலையின்மை 7.3 சதவீதம்

கனடாவின் முக்கிய பொருளாதார மாகாணங்களில் ஒன்றான ஒன்ராறியோவில் வேலையின்மை விகிதம் 7.3 சதவீதமாக உயர்ந்துள்ளது. செப்டெம்பர் மாதத்துடன் ஒப்பிடுகையில் இது 0.3 சதவீதப் புள்ளிகள் அதிகரிப்பாகும்.

பிரிட்டிஷ் கொலம்பியா மாகாணத்தில் வேலையின்மை விகிதம் 6.3 சதவீதமாகவும், கியூபெக் மாகாணத்தில் 5.7 சதவீதமாகவும் பதிவாகியுள்ளது.

 

அல்பேர்ட்டா மாகாணத்தில் ஒக்டோபர் மாதத்தில் 24,000 வேலைவாய்ப்புகள் குறைந்துள்ளதுடன், அங்கு வேலையின்மை விகிதம் 7.3 சதவீதமாக உயர்ந்துள்ளது.

👉கனடா மத்திய வங்கியின் வட்டி வீதத் தீர்மானத்தில் தாக்கம் ஏற்படுமா?

வேலைவாய்ப்புச் சந்தையில் ஏற்பட்டுள்ள இந்தத் தேக்கநிலை, கனடா மத்திய வங்கியின் எதிர்கால வட்டி வீதத் தீர்மானங்கள் தொடர்பான எதிர்பார்ப்புகளிலும் தாக்கத்தை ஏற்படுத்தியுள்ளது.

வேலையின்மை அதிகரிப்பு மற்றும் தனியார் துறையில் வேலைவாய்ப்புகள் குறைதல் ஆகியவை பொருளாதார வளர்ச்சி மந்தமடைவதற்கான அறிகுறிகளாகக் கருதப்படுகின்றன. இதனால் வட்டி வீதங்களைக் குறைப்பதற்கான அழுத்தம் அதிகரிக்கக்கூடும் என சந்தை ஆய்வாளர்கள் கருதுகின்றனர்.

எனினும், வட்டி வீதம் தொடர்பான இறுதி முடிவு பணவீக்கம், பொருளாதார வளர்ச்சி மற்றும் வேலைவாய்ப்புச் சந்தையின் அடுத்தடுத்த தரவுகள் உள்ளிட்ட பல காரணிகளின் அடிப்படையிலேயே எடுக்கப்படும்.

கனடாவில் தற்போது சுமார் 15 இலட்சம் பேர் வேலைவாய்ப்பின்றி உள்ளதாகப் புள்ளிவிபரத் திணைக்களம் தெரிவித்துள்ளது. இவர்களில் 23.7 சதவீதமானோர் 27 வாரங்கள் அல்லது அதற்கு மேலாகத் தொடர்ந்து வேலை தேடி வருபவர்கள் என்பதும் குறிப்பிடத்தக்கது.